Skip to content
domain-names

Ijue Domain Name: Ni nini? Inatumika Wapi? Inahusiana na nini?

Mara nyingi unapokuwa ukihitaji kuwa na website kuna majina ambayo hautakwepa kukutana nayo: domain name, hosting account, bandwidth, n.k.

Na kwa kuwa ni muhimu kujua maana zake na uhusiano wake katika utengenezaji wa website ya biashara yako, wiki hii nimeamua tuyaangalia kwa kuanzia na domain name…

Maana

Ili tuelewe vizuri maana ya domain name, kuna majina mengine ya kiufundi inabidi tuyaelewe. Majina haya yana uhusiano wa moja kwa moja na domain name na jinsi inavyofanya kazi.

IP Address

 Anwani ya kifaa chochote mtandaoni inaitwa IP address(Internet Protocal address).

Ni kwa kutumia anwani hii vifaa vilivyoko mtandaoni huwasiliana. Mfano wa IP address ni 1.160.10.240.

Kama unasoma post hii bila shaka uko mtandaoni, kwa hivyo unaweza kutumia google kujua IP address ya kifaa unachotumia (kompyuta,simu,n.k): andika ‘my IP address’ ama ‘what is my IP address’ na kisha tafuta; google italeta IP address ya kifaa ambacho kimetumika kutuma ombi hilo.

Domain Name

 Domain name ni jina linaloeleweka na linaloweza kukumbukwa kwa urahisi la IP address ya kompyuta zinazohifadhi website mtandaoni. Mfano wa domain name ni kama: fanyaict.net, google.com, ifm.ac.tz, maxima.co.tz, n.k.

Pasipo domain name ingehitaji uandike 74.125.224.72 badala ya google.com!

DNS

Hata hivyo kwa kuwa mtandao umejengwa juu ya IP address na si domain names kuna mfumo wa kutafsiri na kuhusianisha domain name na IP address yake. Mfumo huu unaitwa DNS(Domain Name System). Kila unapoandika domain name, mfumo huu huitafsiri kwenda kwenye IP address yake kabla ya kukuwezesha kufika katika website husika.

URL

URL (Uniform Resource Locator) ni anwani ya maneno ya mtandaoni. Anwani hii inabeba taarifa nyingi kama domain name, jina la ukurasa unaotakiwa, faili ambapo ukurasa huo upo na utaratibu wa kimtandao unaotumika kuupata ukurasa hiyo.

Mfano wa URL ni:

  • http://jeemu.co.tz/
  • https://developers.google.com/speed/docs/insights/LeverageBrowserCaching
  • http://www.mwananchi.co.tz/Picha/-/1597602/1596066/-/jf2yt6z/-/index.html

Muundo

Domain name ina sehemu kadhaa, zile za kulia zikiwa ni za kiujumla na za kushoto zikiwa ni za kipekee. Ni kama jina lako kamili, jina la ukoo (sehemu ya kiujumla) kulia na lako binafsi (sehemu ya kipekee) kushoto . Sehemu hizi huitwa domains na hutenganishwa na nukta(.).

  • TLD (Top Level Domain) ni ile iliyo kulia zaidi mwa domain name. Kutoka kwenye mifano yetu hapo juu, .net, .com, na .tz zote ni TLD.
  • Middle Level domain huwa zipo katikati mfano, .co na .ac
  • Machine level domain (machine name) huwa kushoto zaidi mfano, google., fanyaict., ifm., maxima.

TLD na middle level domain mara nyingi huwa zina maana na ni kwa matumizi maalum. Mfano:

  • .gov, .go – Taasisi za serikali(gov, go ni kifupisho cha government-serikali)
  • .edu, .ac – Taasisi za elimu (edu ni kifupisho cha education – elimu/ac ni kifupisho cha academic – taaluma)
  • .org, .or – Taasisi za kujitolea (org, or ni kifupisho cha organization)
  • .com, .co – Taasisi za kibiashara (com, co ni kifupisho cha commerce – biashara)
  • .net – Taasisi zinazojihusisha na mambo ya mtandao (net ni kifupisho cha Network – mtandao)
  • .tz, .uk, .ke, n.k – Vifupisho vya nchi husika; kwa mpangilio, Tanzania, UK(Uingereza), Kenya, n.k.
  • Orodha inaendelea na kuendelea kwa kuwa kila baada ya muda fulani vinaanzishwa vifupisho vipya.

Kifuatacho ni nini?

Bila shaka maswali yaliyobaki ni: Kwa nini unahitaji domain name? Ni jinsi gani unaweza kuchagua domain name? Na namna gani unaweza kuisajili?

Kwa leo acha tuishie hapa. Katika post ijayo tutajibu maswali hayo.

Je, wewe ulikuwa unaelewa nini ulipokuwa ukisikia maneno ‘domain name’? Na kipi unahisi wengine wanapaswa kukijua juu ya domain name ingawa sikukigusia katika post hii? Tushirikishe katika comments hapo chini.

Leave a Comment

Your email address will not be published. Required fields are marked *

*
*